LAOAG CITY – Positibo ti naiyuswat a search warrant operation iti Barangay 5, San Ramon iti ili ti Vintar babaen kadagiti kameng ti pulisya.
Nabigbig ti subject ti operasyon a ni Jun Paul Damo, ken residente iti nadakamat a barangay.
Ti search warrant ket inparuk-at ni Hon. Judge Nida B. Alejandro, iti RTC Branch 12 ken biruken dagiti otoridad ti maysa a kalibre 45 a paltog, balbala ken 12 gauge shotgun.
Nakumpiskar dagiti kameng ti pulisya iti uneg ti pagtaengan ni Damo ti maysa a kalibre 45 a paltog ken innem a bala daytoy, dua nga empty shell ti 9MM ken maysa nga airgun caliber 22.
Mainaig iti daytoy, inpetteng ni Damo a ti laeng ikot na ket ti airgun ken awanen ti sabali ken patien na a naimula dagiti naala manipud iti pagtaengan na.
Inakusaran pay ni Damo a sakbay a pormal a nangrugi ti operasyon ket adda ti nakita ti asawa na a maysa a pulis a simrek iti balay da.
Inbatad na nga awan ti ammo na a rason a maiyuswatan ti search warrant operation gapo ta awan met ti nakairamramanan na malaksid laeng iti panagsasarita da iti barangay kalpasan ti gandat a panangdanong ti nabartek a pulis kenkuana idi Pebrero ngem saan a natamaan ken ti maysa a konsehal ti nadanog.
Kunana a kalpasan a nagpadespensar ti pulis kenkuana ket awanen ti ammo na a rason ken patien na nga adda ti pakainaigan na daytoy iti naiyuswat nga operasyon.
Kabayatanna, kuna ni Police Major Arnel Tabaog, ti chief of police ti PNP-Vintar a sungbatan da ti alegasyon ni Damo iti korte gapo tya sakbay simrek dagiti pulis ken nakapkapan dagitoy ken adda ti media ken opisyales a nakimatang.
Inlawlawag na pay a saan a planted wenno naimula dagiti paltog a naala gapo ta agpada ti lupot a nakaputipot iti airgun ken maiapgarop a kalibre 45 a paltog.
Innayon na a basar iti panagdamdamag na iti karruba ni Damo, maipagarop a ti paltog ni Damo ket us-usaren na a pammutbuteng iti karruba ken kanayon a maireport iti barangay daytoy.
