LAOAG CITY – Negatibo ti resulta ti search warrant operation iti pagtaengan ni Barangay Chairman Jay Ramos iti Barangay 23 ditoy ciudad ti Laoag.
Nailanad iti search warrant a ti biruken dagiti otoridad ket maysa a kalibre 45 a paltog.
Segun kenni Ramos, mapan kuma ag-jogging ngem isu met ti panagsangpet dagiti ado a pulis iti pagtaengan da agingga a naamoan na a mangiyuswat da ti search operation.
Inlawlawag na a nasdaaw gapo ta ti kalibre 45 a paltog a nailanad iti search warrant ket napukaw pay laeng idi 2013 ken adda met dagiti dokumento nga inpakita na, kasta pay ti maysa a paltog na ket insuko na iti Philippine National Police (PNP).
Nupay kasta, inpalubos na latta ti pannakaisayangkat ti operasyon ken negatibo ti resulta na.
Kabayatanna, negatibo met ti naiyuswat a search warrant iti pagtaengan ni ABC President Pepe Felipe iti Barangay Parparoroc iti ili ti Vintar.
Ti search warrant kontra kenkuana ket naggap iti korte iti La Union ken nailanad a maipagarop nga adda ti ikot na a kalibre 45 a paltog, 9MM ken bala.
