LAOAG CITY – Inrakurak ti Malakanyang a nagikkat iti pwesto ni Department of Trade and Industry Secretary Alfredo Pascual.
Iti statement, inbatad ti Presidential Communications Office (PCO) a mismo nga inyawat ni Pascual ti resignation letter na kenni President Ferdinand Marcos, Jr. kabayatan ti panagtaripnong da iti Palasyo.
Inawat met ti Presidente ti resignation ni Pascual ken agepekto daytoy intono Agosto 2.
Iti met palawag ni Pascual, inlawlawag na a ti rason ti panagikkat na kas sekretaryo iti departmento ket gapo ta daytoyen ti panawen nga agsubli iti pribado a sektor.
Segun kenni Pascual, babaen iti akem na iti pribado a sektor ket maitultuloy na nga ipakat ti ammo ken kapadasan ken maaddaan pay ti naan-anay nga oras iti pamilya na.
Ibilang na met a dakkel a prebelihiyo ken pakaidayawan ti panagserbi na iti administrasyon Marcos ken maipagpannakkel na dagiti naaramidan na iti departamento.
Mainaig iti daytoy, bigbigen met ti Presidential Communications Office ti naisangsangayan a serbisyo ni Pascual iti ekonomiya ti pagilyan.
Inbatad met ni Marcos a ti pokus ni Pascual iti MSMEs ket usto ket mangrugrugin a makita ti bunga ti polisiya daytoy.
Kunana a maladingitan da iti panagikkat ni Pascual ngem respetaren da ti desisyon na a daytoyen ti panawen tapno agsublu iti pribado a sektor.
Sakbay a nadutukan ni Pascual iti Department of Trade and Industry idi 2022, nagserbi daytoy iti Management Association of the Philippines (MAP), Institute of Corporate Directors (ICD), Asian Development Bank (ADB), University of the Philippines (UP), ken iti Asian Institute of Management (AIM).
Dagiti napalabas pay a board memberships na ket Philippine Institute of Development Studies (PIDS), International Rice Research Institute (IRRI), Institute for Solidarity in Asia, ken iti Financial Executives Institute of the Philippines (FINEX) ken dadduma pay.
Manipud 2011 agingga iti 2017, nagserbi kas Presidente ken Co-Chair iti University of the Philippines.
Kabayatanna, inbatad ti Malakanyang nga agbirok a dagus ti sumukat kenni Pascual.
