LAOAG CITY – Inbalakad ni Presidential Communications Operations Office (PCOO) Secretary Martin Andanar a saan a basta agtalek wenno mamati kadagiti mabasbasa a report iti social media.
Iti eksklusibo nga interview iti Bombo Radyo Laoag ken ni Andanar, inbatad na a no adda dagiti mabasa a report iti social media kas ti facebook ken adda ti panagdudua no pudno wenno saan, masapol nga iberipikar a naimbag sakbay nga i-share.
Segun ken ni Andanar, masapol nga agtitinnulong tapno malapdan ti pannakaiwaras dagiti peke a damag gapu ta daytoy ti mangperdi ti demokrasya.
Mainaig ti daytoy, inpalagip ni Andanar nga iti mapaspasangasangan nga SK ken Barangay Elections, liklikan ti agiwaras ti peke a damag kontra kadagiti kandidato.
Daytoy ti nagbalin a palawag ni Andanar seknan ti panagraira dagiti fake news iti social media.
