LAOAG CITY – Bwineltaan ni Public Works Secretary Vince Dizon ti kontraktor a ni Sarah Discaya gapo ta imbes a maasyan kadagiti tattao nga agtultuloy nga agsagsagaba gapo kadagiti substandard ken ghost flood control projects na ket panpanunuten na ti pamilya na.
Daytoy ket kalpasan nga inbatad ni Discaya nga agamak para kadagiti annak na.
Inlawlawag na a saan na a maawaan no apay a maasyan laeng ti pamilya na gapo ta rumbeng kuma nga adda met ti asi na kadagiti tattao.
Inpetteng ni Dizon nga ado a tattao ti nalayos idiay Bulacan ken Davao Occidental nga agkasapulan ti pagadalan ken pagtaengan.
Maipalagip a boluntaryo a nagturong ni Discaya iti National Bureau of Investigation kalpasan nga inrakurak ni President Marcos ti pannakatiliw na gapo iti kaso krimial a naipila.
Ti met asawa na a ni Curlee Discaya ket nakabalod iti Senado kalpasan a nacite in contempt.
