LAOAG CITY – Napaigetan pay ti kampanya kontra iti kurapsyon ti gobierno kalpasan nga inpila ni Department of Public Works and Highways (DPWH) Secretary Vince Dizon ti ummuna a batch ti kaso kriminal iti Office of the Ombudsman.
Target ti kaso dagiti sumagmamano nga opisyal ti DPWH ken dagiti contractor a maipagaropa karaman iti anomaly a flood control projects iti nagduduma a paset ti pagilyan.
Karaman kadagiti maimbestigaran ket dagiti kameng ti Bulacan 1st District Engineering Office kas kenni dati a district engineer Henry Alcantara ken Brice Hernandez, nga iti agdama ket nakabalod iti Pasay City Jail kalpasan ti contempt order ti Senate Blue Ribbon Committee.
Mapilaan pay ti kaso dagiti contractor kas iti Wawao Builders, Syms Construction Trading, ken St. Timothy Construction Corporation, a kukua ti agasawa a Curlee ken Sarah Discaya.
Segun kenni Dizon, dagiti kaso a naipila ket non-bailable ken adda ti pakainaigan na iti ghost projects, substandard a konstruksyon, ken panagkukunsabo iti bidding process.
Maysa kadagiti dinakamat na akaso ket dagiti tallo a flood control projects idiay Oriental Mindoro a napondoan babaen iti 2025 General Appropriations Act ngem awan ti aktwal nga istruktura a naipatakder.
Nagkiddaw metten ni Dizon ti Immigration Lookout Bulletin Order (ILBO) kontra kenni dati nga Undersecretary Roberto Bernardo a maipagarop nga adda ti pakainagan na iti kuwestiyonable a proyekto.
Gagem daytoy tapno lapdan ti posible a panagruar ni Bernardo iti pagilyan kabayatan nga agtultuloy ti imbestigasyon.
