LAOAG CITY – Inlawlawag ni Sector-In-Charge of the Monetary and Economics, Bangko Sentral ng Pilipinas Ms. Iluminada Sicat ti 25 basis points cut policy rates ti Bangko Sentral ng Pilipinas.
Segun kenkuana, inbaba ti Bangko Sentral ti policy rate gapu iti agtultuloy a panagbannayat ti inflation rate nga agturong iti target ti gobierno a 2-4 a porsiento.
Manamnama a makatulong daytoy a mangpababa iti interes a singiren dagiti banko kadagiti pautangda para kadagiti kliyente nga agnegnegosio wenno mangrugi iti negosio.
Manamnama met a pababaen dagiti banko ti interesda para kadagiti kliyente, tapnu ad-adu a negosio ti maaddaan iti gundaway nga umutang kadagiti banko a nababbaba ti interesna.
Innayonna a babaen iti daytoy, mapalawa iti panagpuonanda ken mangyeg iti ad-adu a produksion ken aktibidad iti ekonomia ti pagilian, a mangibunga iti nangatngato a panagdur-as ti ekonomia.
Kabayatanna, agtultuloy a bantayan ti Bangko Sentral ng Pilipinas no suroten dagiti banko daytoy nga addang babaen ti panangpababada iti interesda kadagiti pautang ngem adda ti decision kadagiti banko no surutenda iti panagbaba ti policy rate.
