LAOAG CITY – Kinumpirmaran ni Police Lt. Tolentino Erum Jr., ti chief of police ti PNP-Nueva Era ti balligi a pannakatiliw ti maysa a security guard gapo iti sangsangwen na a kaso a panaglabsing iti Omnibus Election Code.
Segun kenni Erum, natiliw da ti akusado iti Barangay Balatong ditoy ciudad ti Laoag ngem ti residente iti Barangay Sungadan iti ili ti Paoay.
Inlawlawag ni Erum a ti nasao nga akusado ket nagrehistro iti ili ti Paoay ken inulit na ti nagparehistro iti ciudad ti Batac a naiget a maipawil ken maibilang daytoy a flying voter.
Inbatad na nga idi rimuar ti warrant of arrest nga inisyu ni Judge Melanio Roxas Jr. iti RTC Branch 18 iti ciudad ti Batac ket saan a dagus a natiliw.
Daytoy ket gapo ta nagturong idi idiay Manila ken idi nagsubli ditoy probinsya ket nagnaed ditoy ciudad ti Laoag no sadinno ket 19 a tawen a naglemlemmeng.
Kabayatanna, narekomendaran met daytoy ti 12 a ribo a pisos a pyansa.
