LAOAG CITY – Nagballigi dagiti kameng ti Provincial Drug Enforcement Unit (PDEU) a nangtiliw iti maysa a drug personality iti inyuswat da a drug buy-bust operation iti Barangay 28 ditoy ciudad ti Laoag.
Nabigbig ti subject ti operasyon a ni Ponciano Dy Jr. y Duldulao , agtawen ti 45, security guard ken residente iti Barangay 15 ditoy ciudad ti Laoag.
Dagus a kinemmeg dagiti kameng ti PDEU ti suspek kabayatan ti panangiyawat na ti maysa a sachet a naglaon ti maipagarop a shabu nga agbalor ti sangaribo a pisos iti nagpammarang a poseur-buyer.
Iti pannakakapkap ti suspek ket nakakumpiskar pay dagiti otoridad ti maysa a sachet a naglaon met laeng ti maipagarop a shabu ken ti sangaribo a pisos a nausar iti operasyon.
Basar kadagiti otoridad, ni Dy ket mabilang kas High Value Target ti Provincial Drug Enforecement Unit (PDEU) ken Philippine Drug Enforcement Agency (PDEA) ditoy probinsya.
Kabayatanna, iti pananginterview ti Bombo Radyo Laoag ken ni Dy ket inpetteng na a saanna a kukua dagiti naala nga ebidensya kontra kenkuana.
Inlawlawag na a nagsardeng laeng iti lugar gapu ta adda ti kinasarita na iti cellphone ngem saanen a nangipaay ti dadduma pay a detalye.
