LAOAG CITY – Kinumpirmaran ni Police Major Joseph Tayaban, ti chief of police ti Philippine National Police iti ili ti Badoc a pimmusay ti maysa a lalaki kalpasan ti pannakadesgrasya na iti Barangay Lacuben iti nasao nga ili.
Binigbig ni Tayaban ti biktima a ni Henson Magderila, maysa a security guard ken residente iti Barangay Balbuena iti ili ti Pinili.
Segun kenni Tayaban, iti imbestigasyon da ket napaspas ti panagpataray ti biktima nga agturong iti ili ti Sinait partikular iti Corpuz Hospital ken mapan ag-duty.
Nupay katsa, kunana nga idi nakadanon iti nasao a paset ti kalsada ket nadalapos na a bato iti igid ti kalsada ken posible a tinalyaw na daytoy agingga a naidungpar iti puon ti gmelina.
Kunana nga adda ti suot nga helmet ti biktima ken saan a nakainom ti nasanger ngem napaspas ti panagpataray na napigsa ti impact daytoy ken naipurwak iti igid ti kalsada.
Inlawlawag na nga adda ti nakakita iti desgrasya ken intawag da iti pulisya ken naitaray iti Corpuz Hospital ngem naideklara a pimmusay babaen iti doktor.
