LAOAG CITY – Nasakit ti nakem ni Mr. Marcon Ancheta, Security Guard iti Shamrock Elementary School ditoy siudad ti Laoag kalpasan nga induron isuna ti maysa kadagiti nagannak dagiti estudiante iti nasao a pagadalan.
Segun kenkuana, sinitana ti maseknan a nagannak a mapan agsirsirip iti klasrum gapu ta mangitunda daytoy ti saan a pannakapokus dagiti ubbing iti klaseda.
Inbatadna nga adda ti pammilin kenkuana iti School Principal a saanna nga ipalubos nga adda dagiti nagannak a mapan sumirip kadagiti klasrum kabayatan ti klase dagitoy.
Inlawlawagna a kinagura ti maseknan a nagannak ti panangsitana kenkuana isu a napan nagipulong kadagiti kakabsatna agingga a sinalangadda ken induronda isuna.
Mainaig iti daytoy, kuna ni Ancheta nga inbagana ti nasao a nagannak a mapanda agsasarita iti Principal’s Office ngem nagkedked dagitoy.
Inpalgakna a nagkiddaw isuna ti panagpadispensar iti nadakamat a nagannak ngem gagemna a maikkan ti pagmennamennaan iti inaramidda kenkuana.
Innayonna a nangrugi ti pannakaipatungpal ti pannakaipawil ti panagserrek dagiti nagannak iti uneg ti klasrum ita a bulan ti Setiembre.
Nupay kasta, naammoan a saan a naipakaammo ti nasao a pammilin ti pagadalan kadagiti nagannak.
Kabayatanna, nagturong ti Bombo Radyo Laoag News Team iti opisina ni Mrs. Cecilia Antonio, School Principal IV iti nasao a pagadalan tapno alaen ti takderna ngem naduktalan a naka-mourning leave daytoy.
