LAOAG CITY – Kinumpirmaran ni Police Major Ryan Retotar, ti chief of police iti ili ti Dingras a ti naarestar a security guard ket under probation iti kaso a “life threat” iti nasao nga ili ken frustrated murder ditoy ciudad ti Laoag.
Nabigbig ti suspek a ni DODDY DONG ESPEJO II y Baruso, 33, naasawaan, miembro ti Civil Security Unit iti LGU-Dingras, ken residente ti Brgy Sagpatan, ti nasao nga ili.
Immunan a naarestar ni Espejo kalpasan a naduktalan nga adda ti iggem na a kalibre 45 a paltog babaen ti naisayangkat a checkpoint iti nasao nga ili.
Segun ken ni Retotar, iti imbestigasyon da ket personal a paltog ni Espejo ti naala da ken nabayagen nga ik-ikutan na daytoy.
Napasamak ti pannakaarestar ni Espejo kabayatan ti papanna panagduty iti Barangay Cali ti nasao nga ili.
Ni Espejo ti maitudtudo a nangpaltog iti maysa a lalaki iti paset ti C5 Road iti ili ti Sarrat iti kallabes.
Nupay kasta, kuna ni Retotar a mangisayangkat da pay laeng ti profiling tapno maamoan no pudno daytoy wenno saan.
