LAOAG CITY – Nagreklamo ditoy Bombo Radyo Laoag ti maysa a security guard gapu ti panangisyu kenkuana dagiti kameng ti Philippine National Police (PNP) ti citation ticket gapu ti maipagarop a panagparking na iti saan nga umiso a pagparkingan.
Daytoy ket kalpasan nga inparking ni Alejo Balegad, security guard ken taga Barangay Apatot Lubong iti ili ti Pinili ti motorsiklo na iti igid ti kalsada iti paset ti Barangay San Francisco iti ili ti San Nicolas.
Inpetteng ni Balegad a dua a bolanen nga agparparking iti lugar ngem saan a masitsita isut gapuna a masdaaw iti panangisyu da kenkuana ti ticket.
Innayon na nga addamet dagiti kakadwa na nga agparparking iti lugar ngem maipagarop nga isuna laeng ti nasita ken naikkan ti citation ticket.
Kabayatanna, kuna ni Police Corporal Romeo Bartolome iti PNP iti ili ti San Nicolas, saan a pudno ti ibagbaga ni Balegad a dua a bolanen nga agparparking iti lugar gapu ta adda ti isaysayangkat da a road clearing ngem iti dayta laeng a gundaway a nakita.
Innayon na nga iti panangkita da pay ti driver’s licence ni Balegad ket naduktalan da nga expired daytoy.
