LAOAG CITY – Agpada a pimmusay dagiti agpagayam a nagkainnuman iti Brgy. 19 iti ili ti Vintar.
Basar iti inisyal a report ti Phlippine Nationa Police – Pasuquin, aggi-inom ti biktima a security guard ti INCAT ken tubo iti San Juan, Ilocos Sur iti pagtaengan ti suspek nga agtawen ti 38 iti Brgy. 19, Vintar pakairamanan dagiti dadduma a pagayam da.
Kabayatanna, apaman nga agi-innom dagitoy ket kellaat a binagkong iti namin ado a daras ti suspek ti biktima.
Nagsagaba ti sugat iti nagduduma a paset ti bagi ti biktima ken pimmusay gapu iti severe hemmorrage secondary to multiple stabbed wounds, basar iti eksaminasyon ni Dr. Heidi Marita Albano.
Iti sabali a bangir, apaman a nalps ti insidente ket nagturong ti suspek iti kabanbantayan ti Brgy.20-Columbia iti nasao nga ili ken dita a nagbekkel nga isu met ti dagus a nakakettelan ti biag na.
Agpapan a maisursurat ti damag ket agtultuloy ti imbestigasyon dagiti otorida kadagiti nasao a pasamak.
