LAOAG CITY – Natay ti maysa a Security Guard kalpasan a nadisgrasia ti naglugananna a motorsiklo iti paset ti provincial road iti Barangay Saud iti ili ti Pagudpud.
Nabigbig ti biktima a nangiturong ti Yamaha Sniper 155 a ni Rogelio Santos Jr., agtawen ti 28 ken residente ti Barangay Pob. 2 iti nasao nga ili.
Basar iti Pagudpud Municipal Police Station, kabayatan a dumaldalyasat ti driver ti motorsiklo nga agturong nga agpa-daya ket kellaat daytoy a napukawan ti kontrol ti manibela a nangitunda ti pannaka-slide-na iti agarup 20 a metro.
Gapu iti daytoy, nagsagaba ti biktima ti sugat iti nagduduma a paset ti bagina ken naitaray iti Pagudpud Adventist Wellness And medical Center babaen kadagiti kameng ti Bureau of Fire Protection a napan nagresponde iti insidente ngem naideklarar a dead on arrival babaen ti attending physician.
