LAOAG CITY – Natay ti maysa a security guard kalpasan a pinaltogan ti katrabahoan a kinainuman na iti ESY warehouse iti Barangay Cali iti ili ti Dingras.
Nabigbig ti biktima a ni Jimuel Cacactin, addaan ti umno nga edad, maysa a security guard ken residente iti ili ti Banna idinto a ti suspek ket ni Vincent Reyes y Lazo, pahinante iti truck ken residente iti Barangay Imelda iti ili ti Marcos.
Iti inisyal nga imbestigasyon ti PNP-Dingras, itay ala-una ti parbangon ket naggi-inuman ti biktima, suspek ken dagiti katrabahoan da iti mismo a bodega idi adda ti saan a panagkinnaawatan dagiti dua.
Gapo iti daytoy, inasuot ni Reyes ti paltog na ken pinaltogan na ti muging ni Cacactin ken kalpasan daytoy a puon ti nakatayan na.
Mainaig iti daytoy, kinumpirmaran ni Police Staff Sergeant Julius Renan Peralta iti PNP-Dingras a natiliw ti suspek iti mismo a pagtaengan da ken addan iti kustudiyar da ti kalibre 38 a paltog a nausar iti krimen.
Iti nakalap nga impormasyon ti PNP-Dingras ket maipagarop a saan a nasayaat ti pannakikadua ti biktima iti pagtrabahoan da.
Kabayatanna, kuna ni Barangay Chairman Teddy Rosqueta iti Barangay Cali iti ili ti Dingras nga iti panagimbestigar na iti napasamak ket naamoan na nga adda ti saan a panagkinnaawatan ti biktima ken ti asawa rason a ti babai ket napan idiay Dingras.
Inbatad na nagpaiyakar ti pagtrabahoan ti biktima iti ili ti Dingras tapno maurnos na ti problema da nga agasawa.
Patien ni Rosqueta a ti problema iti pamilya ti biktima ti rason a saan met a nakatutok iti trabaho na.
