LAOAG CITY – Balligi a naarestar ti maysa a security guard ti DPWH 1st Engineering Dictrict iti naiyuswat a drug buy-bust operation iti Brgy. 7 ditoy siudad ti Laoag.
Nabigbig ti susject ti operasyon a ni Jason Mamuad y Jovila, agtawen ti 37, addaan ti live-in partner ken residente iti Brgy. 9 iti ili ti San Nicolas.
Nakumpiskar manipod iti suspek ti maysa a plastic a sachet a naglaon ti maatap a shabu ken nausar iti transaksyon pakairamanan ti sangaribo a pisos a buybust money ken personal a kwarta daytoy.
Malaksid iti nausar iti transaksyon nga iligal a droga, adda pay ti nayun a lima a sachet ti maipagarup a shabu ti naala manipod iti sling bag ti suspek.
Kabayatanna, inpetteng ti suspek a naipabulsa kenkuana ti iligal a droga babaen kadagiti otoridad.
Inlawlawag na nga adda kuma ti kakinnita na a babai iti nasao a lugar tapno itulod na iti sentro ditoy siudad sakbay a sumrek iti duty na ngem dita metten a kellaat a nakemmeg.
Inbatad na a sidadaan a dumalan iti drug test tapno mapaneknekan nga awan ti pakainaigan na iti iligal a droga.
Kabayatanna, naamoan a ti suspek ket High Value Individual ken miembro ti maysa a drug group ditoy probinsya.
