LAOAG CITY – Inlawlawag ni Presidente Ferdinand Bongbong Marcos Jr. a security issues ti maysa kadagiti makitkitana a problema iti National Grid Corporation of the Philippines wenno NGCP.
Segun kenkuana, manarimaan ti panangimbestigar ti Kongreso ti performance ti National Grid Corporation of the Philippines no daytoy ket simmurot ti kontrata iti nagbaetan ti gobierno ken ti nasao a korporasion.
Inbatadna a no maikkat ti prangkisa ti National Grid Corporation of the Philippines ket adu ti mairamraman nga empleado ken no mapasamak daytoy ket masapol nga agbirok ti baro nga agpaay ken dumalanda pay ti panagsanay dagitoy.
Dinakamatna no apay nga adda dagiti mapaspasamak nga outage iti paset ti Negros ken Panay Islands idinto a mayat met ti power suplay dagiti dadduma a rehion ti pagilian.
Innayonna nga agbalin a dakkel a problema no maminpinsan a maikkat wenno mapatalaw dagiti agpapaay iti National Grid Corporation of the Philippines gapu ta awan ti mangmanihir iti daytoy.
