LAOAG CITY – Nakasaganan ti Philippine National Police (PNP) no bilang maipada iti Indonesia ken Nepal dagiti tignay-protesta wenno demonstrasyon iti Pilipinas gapu iti kontrobersiyal seknan iti korapsyon iti flood control projects.
Segun ken ni Philippine National Police acting chief Police Lieutenant General Jose Melencio Nartatez Jr., adda dagiti nakasagana a security plans para iti pannakalapped, panangiwanwan ti crowd ken panangipasigurado ti seguridad.
Adda pay ti iggem nga impormasyon ti nailian a pulisya a mabalin a nausar iti operasyon da.
Agtultuloy met ti panagbantay ti Philippine National Police iti peace and order ken kinatalged iti intero a pagilian.
Maipalagip a kadagiti naglabas nga aldaw ket nangiyuswat ti sumagmamano a grupo kadagiti tignay-protesta iti baet dagiti report a korapsiyon iti flood control projects ti gobyerno kalpasan nga ado dagiti lugar iti pagilian a nalayos manipod kadagiti napipigsa a tudo kadagiti napalabas a bolan.
Agpada met a senaryo ti mapaspasamak iti sabali a pagilian kas iti Nepal gapu iti korapsiyon ken iregularidad, ngem nakarkaro iti demonstrasyon iti nadakamat a pagilian gapu ta rinaot dagiti protesters ti parliamento ken pinuuran da dagiti balay ti sumagmamano a pulitiko.
Iti met Indonesia ket rinibo a tattao dagiti nangiyuswat ti tignay protesta iti ruwar ti parliamento kas panangkontra iti panagngato ti housing allowance dagiti miembro ti parliamento a rimsua idi Agosto 25 ti agdama a tawen.
