LAOAG CITY – Inbatad ni Atty. Donato Balderas, ti Schools Division Supt. iti Department of Education – Ilocos Norte a pinaigetan da ti security protocol para iti nasao nga opisina.
Inaramid da daytoy kalpasan ti napasamak a pammaltog iti mismo a Division Office iti paset ti Mindanao a ti pinuntirya ti suspek ket ti nangato nga opisyal iti nasao nga opisina.
Segun ken ni Balderas, saanen a maipalubos a basta makastrek ti siasinno man iti opisina da a kas ti napaspasamak iti kallbes a silulukat daytoy para iti publiko.
Inlawlawag ni Balderas nga iti baro nga ipatungpal da a pagalagadan ket masapol a no adda ti mapan a bisita da ket itawag nga umuna kadakuada ti gwardya sakbay a naan-anay a makastrek iti opisina da.
Kuna na pay a no agawid ti bisita ket ikumpirmar manen ti guwardya iti opisina da no mabalin nan a palubusan a rumuar ti maseknan.
Mainaig iti daytoy, inpakaammo ni Balderas a karaman met kadagiti saanen a makastrek iti opisina da ket dagiti aglaklako iti nagduduma a produkto, no sadinno a no adda ti order dagiti empleado ket ibati da laengen iti guwardya.
Mangnamnama ni Balderas nga amin koma a pagadalan ket paigetan da ti ipatpatungpal da a safety protocol tapno masigurado ti kinatalged ken seguridad dagiti mangisursuro ken dagiti agad-adal.
