LAOAG CITY – Tingitingenen ti panel of prosecutors ti Department of Justice (DOJ) ti sedition ken rebellion complaints nga inpila ti Philippine National Police-Criminal Investigation and Detection Group kontra ken ni suspended Cavite 4th District Rep. Francisco “Kiko” Barzaga.
Nangisubmitir ti counter-affidavits ni Barzaga idi Biernes, Enero 23 mainaig iti inciting to sedition wenno panaglabsing iti Article 142 ken inciting to rebellion/insurrection wenno panagsalungasing iti Article 138 ti Revised Penal Code (RPC) nga inamendaran mainaig iti Section 6 Republic Act No. 10175 wenno Cybercrime Prevention Act of 2012.
Inbatad ni Department of Justice Spokesperson Polo Martinez a sumangsango iti reklamo ni Barzaga mainaig iti Facebook post-na idi Oktubre 2025 a nangipakita ti suporta kadagiti panawagan nga isina ti Mindanao ken tignay protesta iti Forbes Park idiay Makati City.
Maipalagip nga idi Disiembre ket sinuspenso ti Kamara de Representantes ni Barzaga gapu kadagiti post-na iti social media.
Kabayatanna, adda ti tallo a cyber libel complaints a sangsangoen ni Barzaga gapu kadagiti akusasion a maipagarup nga immawat ti pasuksuk dagiti miembro ti National Unity Party (NUP) manipud iti bilionario a ni Enrique Razon Jr. para iti speakership ni Leyte Rep. Martin Romualdez.
