LAOAG CITY – Inpasigurado ti Office of the Sergeant-at-Arms (OSAA) ti Senado ti kinatalged ni dati a Bamban Mayor Alice Guo no maikabil ti pugante iti Senado tapno ibalud ken mapagsungbat iti sangsangwen na a kaso.
Iti interview, inbatad ni Retired Lt. Gen. Roberto Ancan, hepe ti Office of the Sergeant-at-Arms nga awan pay ti makitkita da a pangta a senyales tapno papigsaen pay ti seguridad ni Alice Guo no maipan iti Senado.
Kuna na nga agtipon da Alice wenno Guo Hua Ping ken ni Shiela Guo a nagpabigbig a kabsat ti dati a mayor iti detention room.
Inrakurak ni Ancan a depende iti agbalin a sitwasyon no kasanu a bantayan dagiti agkabsat iti detention room.
Maipalagip a sumangsango ni Alice iti arrest order ti Senado kalpasan a napaay a nagatendar iti baet ti sumagmamano a panagtawag ken subpoena ti komite nga agim-imbestigar iti human trafficking iti ilegal a Philippine Offshore Gaming Operations hubs iti Tarlac ken Porac, Pampanga.
Im-imbestigaren ti komite nga idadaulwan ni Senador Risa Hontiveros kadwa na ni Senador Sherwin Gatchalian ti pannakairaman ti dati a mayor iti illegal Philippine Offshore Gaming Operations ti kompanya a Zun Yuan Technology Inc. iti Bamban, Tarlac.
Naduktalan pay iti panagdengngeg ti peke a kinatao ni Alice Guo ken Shiela kalpasan nga inbutaktak ti National Bureau of Investigation (NBI) a ti fingerprints da ket kapada ti dua a Chinese national a nagturong ditoy pagilian.
Naakusaran pay dagitoy nga espiya ti China iti Pilipinas gapu ta bumarbara ti tensyon iti panangip-ipit ti Beijing iti barko ti pagilian nga aglaylayag iti uneg ti West Philippine Sea.
