LAOAG CITY – Saan a patien ni Ms. Cathy Estavillo, Secretary ng Bantay Bigas iti nagbalin a rakurak ni Presidente Ferdinand Marcos Jr. a bumaba ti presio ti bagas inton tawen 2025 kas iti inpanamnama idi napan nga eleksion.
Segun kenkuana, dua a tawenen nga ururayen dagiti Pilipino ti nagbalin a kari ni Marcos nga agbalin a P20 ti presio ti bagas sipud idi nagtugaw daytoy kas presidente iti pagilian.
Inbatadna, ti programa a Kadiwa Centers ti gobierno ket limitado laeng dagiti agbalin a benipisiario kas iti senior citizen, 4p’s member ken persons with disabilities.
Nupay adda ti nadakamat a programa ket saan a mailibak a saan nga bimmaba ti presio ti bagas iti merkado publiko.
Inpettengna a ti maysa kadagiti makitana a karit tapnu magun-od ti nalaka a bagas ket dagiti imported rice nga angangakaten ti pagilian no sadinno daytoy ti mailako iti nalaka a presio.
Mainaig iti daytoy, maysa kadagiti makitana a napintas nga aramiden ti gobierno ket maisardeng ti panaglako ken panagangkat ti imported rice tapnu magun-od ti nalaka a presio ti bagas.
Innayonna a mabalin a matulungan dagiti mannalon iti pagilian babaen iti National Food Administration no sadinno ket gatangen ti administration dagiti irik iti presio a kayat dagiti mannalon ken mailako daytoy iti presio a kayat ti consumer.
Kabayatanna, patien ni Estavillo a no suportaran ti gobierno dagiti mannalon maipanggep iti cost of production ket mabalin a mailako ti bagas iti nalaka a presio.
