LAOAG CITY – Simple laeng ti naisayangkat a selebrasyon ti maika-112 a panagkasangay ni dati a Gob. Roque Ablan Sr. ita nga aldaw Agosto 9, 2018.
Daytoy ket babaen ti naisayangkat a programa iti Ablan Shrine a masarakan iti Bgy. 20 ti ciudad ti Laoag a no sadino nga adda ti naiyuswat a “wreaht laying”iti monumento ti nasao a dati nga opisyal.
Nagatendaran daytoy dagiti nadumaduma nga estudyante, mangisursuro, mangopisina iti gobyerno ken pribado a sektor opisyales ti gobyerno, PN ken AFP.
Nagbalin a kangrunaan a sangaili ni Under Sec. Vic Agdamag, Deputy National Security Adviser a nangdaydaywan na ti kinanawar ti dati nga opisyal.
Saan met a nakaatendar da Sec. Bong Go, Special Assistant to the Pres. ken ni Sec. Hermogenes Esperon Jr., Nat’l Security Adviser gapu kadagiti kumikom.
Nagyaman met ti pamilya Ablan kadagiti timmabo iti nasao a selebrasyon.
Maipalagip nga Special Holiday ti Ilocos Norte tunggal madanonan ti Ablan Day Celebration babaen ti Republic Act 6941 a naaprubaran idi April 1990 kas panangbigbig ti kinabarnuar na.
