LAOAG CITY – Inpakaamo ni Fr. Erickson Josue, miembro ti Roman Catholic Diocese of Laoag ngem agdama nga agad-adal ti post graduate studies iti Pontifical Gregorian University idiay Rome, Italy a naiget ti panagsagsagana dagiti kakabsat a Pilipino para iti maika-500 nga anibersayo ti kristiyanismo ditoy pagilyan.
Nu pay kasta, kuna ni Fr. Josue a saan a kasla iti nakadaywan ti pannakaselebrar ti nasao nga aktibidad gapu iti pandemiya.
Inbatad na a malimitaran laeng iti 100 a tattao ti makastrek iti St. Peter Basilica para iti misa ti panagyaman nga idauloan ni Pope Francis iti oras ti alas diyes ti bigat idiay Rome.
Kuna na a dagiti dadduma a saan a makastrek ket mapalubusan nga agtalinaed iti St. Peter Square ngem masapol a masurot ti social distancing.
Mainaig iti daytoy, inpakaamo ni Josue a kadwa ti Santo Papa a mangidaulo ti nasantoan a misa ni Cardinal Luis Antonio Tagle kenni Cardinal Angelo De Donatis pakairamanan ti 10 padi.
