LAOAG CITY – Simple laeng ti maiyuswat a selebrasyon para iti aldaw dagiti mangisursuro wenno ti Teachers Day iti umay a bolan ti Oktubre.
Daytoy ti inbatad ni Dr. Joan Corpuz, Schools Division Supt. ti DepEd ditoy probinsya.
Segun kenni Corpuz, intono Oktubre 4 ket maiyuswat ti School Base Celebration idinto a ti Division Celebration ket awan pay ti naituding a petsa na gapo ta pagsasaritaan dan to pay laeng.
Nupay kasta, kunana a kabayatan ti selebrasyon ket mabigbig ti sakripisyo dagiti mangisursuro para kadagiti estudyante da.
Mainaig iti daytoy, inpetteng ni Corpuz nga awan ti pammilin a masapol nga adda ti kontribusyon dagiti nagannak para iti maysa a mangisursuro.
Nupay kasta, inbatad na a no boluntaryo nga ited dagiti maseknan ti maysa a banag kas panangbigbig da iti sakripisyo dagiti mangisursuro ket pagyamanan da daytoy.
Kabayatanna, immapela ni Corpuz kadagiti amin a mangisursuro a saan da nga agpa- kontribusyon kadagiti nagannak para iti nasao a selebrasyon.
