LAOAG CITY – Mangnamnama ni Senador Ronald “Bato” dela Rosa nga agbalin a patas iti ruling ti Korte Suprema kalpasan a nangipila ti kampo ni dati a Presidente Rodrigo Duterte ti “Motion for Reconsideration” a mangal-allukoy iti Korte Suprema nga agtignay para iti panagsubli ditoy pagilian ti dati a Presidente.
Daytoy ket kalpasan nga ibasura ti Korte Suprema ti kiddaw a temporary restraining order (TRO) kontra iti panangarestar ken ni Duterte ti International Criminal Court (ICC).
Immapela ni Dela Rosa iti Supreme Court nga agdesision basar iti merito ti kaso ken saan nga agpadiktar iti pulitika.
Kiniddaw ti Senador, buo koma ti desision ti Korte Suprema ken awan ti ikonsiderar a pulitika wenno pressure manipud iti sabali a sektor ti gobierno nga uray pay isuna a maysa kadagiti petitioners a manipud iti Senado ken uray ti Malakanyang nga inawagan ni Dela Rosa nga oppressive dagiti ar-aramidenda kontra kadakuada.
Maipalagip nga inbatad ni Dela Rosa a nakasagana daytoy a kaduaen ni dati a Presidente Rodrigo Duterte iti International Criminal Court ken agpaarestar apaman nga adda ti warrant nga ipakitada kenkuana.
