LAOAG CITY – Nangipatulod ti audio message ni Sen. Bato dela Rosa iti pannakairubuat ti Reform Alliance for Good Governance and Accountability (RAGE) Coalition a naisayangkat idiay San Juan City.
Inbatad ni Dela Rosa, ti nasao a coalition ket maysa a panagkaykaysa ti nagduduma a puersa a nakasagana a tumakder para iti kinapudno, panagsungbat ken pagsayaatan dagiti Pilipino.
Pakairamanan ti RAGE ti Partido Demokratikong Pilipino-Laban ng Bayan (PDP-Laban), Partido Reporma ken Reform PH.
Naudi a nakita iti Senado ni Dela Rosa idi Nobiembre 2025 kalpasan nga inbatad ni Ombudsman Boying Remulla a nagiyisyu ti International Criminal Court (ICC) ti arrest warrant kontra iti senador.
Innaganan met ti International Criminal Court Prosecution ni Dela Rosa idi Pebrero 13, 2026 kas maysa kadagiti maipagarup a “co-perpetrators” ni dati a Presidente Rodrigo Duterte iti kasona a crimes against humanity manaig iti war on drugs.
