LAOAG CITY – Inpetteng ni Sen. Christopher ‘Bong’ Go a nasken a saanen a maulit iti sabali a Pilipino ti napasaran ni dati a Presidente Rodrigo Duterte nga inarestar ken inkabil iti sabali a pagilian tapno ibalud.
Iti privilege speech-na, kagiddan ti umuna a tawen nga anibersario ti pannakaikabil ken pannakaibalud ken ni Duterte iti International Criminal Court (ICC), inbatad ni Go a nasken a siguradoen nga awan ti Pilipino a makapasar iti pannakaiwalin ti legal a proseso nga agserserbi a proteksion ti tunggal umili.
Inpaganetgetna a nakapusta ditoy ti soberania ti pagilian, judicial independence ken dignidad ti tunggal Pilipino.
Naminsan manen a sinublianan ni Go ti Marso 11, 2025 a kunana a maysa daytoy kadagiti maibilang a kalaladingitan nga aldaw iti pakasaritaan ti pagilian.
Iti baet ti inpakita a kinatibker ken kinatured ni Duterte, inlawlawagna a nataengan, nakapsot ken adda ti ang-angalenna a sakit ti dati a Presidente.
Agselebrar ti maika-81 a panagkasangay ni Duterte inton Marso 28 kabayatan nga agtultuloy a sumangsango kadagiti kaso a naipila kontra kenkuana iti International Criminal Court.
