LAOAG CITY – Inallukoy ni Senador Christopher “Bong” Go, Chairperson ti Senate Committee on Health ti Department of Health (DOH) a solbaren ti panagkurang ti bakuna kontra iti rabies iti intero a pagilian nangruna ket ngimmato ti kaso dagiti matmatay gapu iti daytoy.
Madanagan ti Senador iti accessibility ken affordability ti anti-rabies treatment kangrunaanna kadagiti agnanaed iti nasusulinek a lugar.
Naammoan a ti rabies ket maysa a viral disease a mangapektar iti central nervous system ken mangitunda ti panagmaga ti utek.
Basar iti World Health Organization (WHO), nakangatngato ti fatality rate ti rabies no saan a maagasan nga insigida.
Kabayatanna, ti post-exposure prophylaxis (PEP), pakairamanan ti serye ti panagbakuna kontra iti rabies ken ti rabies immunoglobulin ket epektibo a makalapped ti panagwaras ti virus.
