LAOAG CITY – Inpetteng ni Senador Ronald “bato” dela Rosa a puro pulitika laengen ti adda iti panunot ti sumagmamano a kongresista kalpasan nga akusaran da daytoy nga inulaw na dagiti arresting officers mainaig iti lokasyon ni Pastor Apollo Quiboloy.
Immuna iti daytoy, inbatad ti Kamara de representantes a da dela Rosa ken Vice President Sara Duterte ken dadduma pay ket mabalin nga agsungbat ti obstruction of justice kalpasan a nalawag nga inulaw da dagiti opisyal a mangtiliw kennni Quiboloy mainaig iti lokasyon ti pastor a sumangsango kadagiti kaso iti pagilian ken iti Estados Unidos.
Maipalagip nga immapela ni dela Rosa ken ni Presidente Ferdinand Marcos Jr. a mandaren na ti Philippine National Police nga isardeng ti operasyon gapu iti epekto na kadagiti estudyante ken dagiti residente a nagtalinaed iti compound.
Inpetteng ti senador nga ikonkonsiderar na ti sitwasyon dagiti residente iti compound ken makasubli iti panageskwela dagiti estudyante.
Kabayatanna, kiddawen ni dela Rosa ti palawag ni Quiboloy no daytoy ket natiliw wenno simmuko kadagiti otoridad iti kanito a maiyuswat ti panagdengngeg iti senado.
Kuna na a masapol a lawlawagan ti law enforcement agencies no ni Quiboloy ket simmuko wenno natiliw dagiti otoridad gapu ta “Surrender” ti nausar ngem saan a nalawag.
