LAOAG CITY – Nagpangta ni Sen. Ronald “Bato” Dela Rosa a danogenna iti rupa ni self-confessed drug lord Kerwin Espinosa no agkitada gapu ta ulbod daytoy.
Naglikudan ni Dela Rosa ti pammabasol ni Espinosa a binaonna daytoy nga iraman iti ilegal a droga ni dati a Sen. Leila de Lima idi kangitingitan ti “drug war” ni dati a Pres. Rodrigo Duterte.
Inbatadna a naminsanna laeng a nakasarita ni Espinosa idi binisitana isuna tapno saludsuden no pudno ti rakurakna nga ik-ikkanna ti kuarta ni Lt Col. Jovie Espenido.
Inlawlawagna a boluntario idi ti panangipaay ti impormasion ni Espinosa.
Kuna ni Dela Rosa, inbaga ni Espinosa iti panagdengngeg iti Senado idi 2016 nga umaw-awat ti kuarta kenkuana ni Espenido gapu iti sakit ti nakem gapu ta pinatay iti pagbalodan ti amana a ni dati nga Abuera, Leyte Mayor Rolando Espinosa.
Naiget a naglikudan ni Dela Rosa a binutbutengna ni Espinosa nga itultuloy ti panagpataray iti ilegal a droga idiay Albuera nupay nakaibaloden iti National Bureau of Investigation.
Kuna ni Dela Rosa a saan a credible a testigo ni Espinosa.
Kabayatanna, naminsan manen nga inpasigurado ni Dela Rosa a saan daytoy nga agatendar iti panagdengngeg ti quad committee iti House of Representatives uray maminsan pay nga imbitaran isuna.
