LAOAG CITY – Inbatad ti International Criminal Court (ICC) Assistant to Counsel a ni Atty. Kristina Conti a nasaysayaat no boluntaryo a sumuko ni Sen. Ronald “Bato” Dela Rosa ken bigbigen ti hurisdiksiyon ti International Criminal Court.
Daytoy ket kalpasan nga adda ti rimuar a report a nangiparuk-aten ti warrant of arrest ti International Criminal Court kontra ken ni Dela Rosa mainaig iti kampanya kontra ti illegal a droga ti administrasyon ni dati a Presidente Rodrigo Duterte.
Inlawlawag na a no maarestar ti agpanpanday linteg, ti proseso ket surrender ken saan nga extradition gapu ta ti International Criminal Court ket maysa nga international a korte ken saan a maysa a soberano nga estado.
Inlawlawag ni Conti a ti extradition ket maiyataday laengkadagiti foreign warrant of arrest a dumaldalan iti lokal a korte, idinto a ti surrender ket kooperasyon iti International Criminal Court para kadagiti miyembro ken saan a miembro a pagilian.
Inpettengna pay a saan a rumbeng a protehiran ti senado ni Dela Rosa aglalo ket awan ti isumsumitir na a sungbat iti nadadagsen nga akusasyon kontra kenkuana.
Ti panawagan ket nakatutuk iti panangsigurado a ti Senado ket saan nga agbalin a pagkamangan dagiti addaan ti kaso kriminal.
