LAOAG CITY – Nagpanawagan ni Senate Committee on Finance Chairman Senador Sherwin Gatchalian a dagus nga urnusen wenno tarimaanen dagiti classrooms a nadadael kalpasan dagiti nagsasaruno a kalamidad idi Hunyo agingga iti
Oktubre ita a tawen, tapno maliklikan nga ad-adda pay a kumaro ti panagkurkurang ti classrooms iti pagilian.
Inpetteng ti senador a masapol nga iyalisto ti agtignay wenno agtrabaho gapu ta adda ti posibilidad a kumaro ti agdama a panagkurkurang ti sumuruk-kumurang a 165,000 a classrooms no maibaybayag paylaeng ti pannkatarimaan da.
Inkalintegan na pay ti kinapateg ti natalged ken napaot a pasdek ti pagadalan, kangrunaan na dagiti lugar a masansan a dupraken ti bagyo ken gingined.
Inpetteng ni Gatchalian a saan a rumbeng nga ipalubos a maulit-ulit a madadael dagiti classrooms no adda dagiti kalamidad.
Innayon na a masapol a natibker, natalged ken manayun dagiti maaramid a siled kadagiti pagadalan.
Gagem ti panawagan ti senador ket tapno masigurado a saan a maitantan ti panagadal ken ad-adda pay a mapasayaat ti kinatalged dagiti agad-adal iti intero a pagilian.
