LAOAG CITY – Saan pay laeng a makaipaay ti naan-anay a komento ni Sen. Sherwin Gatchalian, Chairman ti Senate Committee on Education iti pannakatay dagiti dua nga estudyante iti Signal Village National High School idiay Taguig City.
Segun kenni Gatchalian, ti insidente ket im-imbestigaren pay laeng ti Philippine National Police ken urayen na no anya ti agbalin a resulta daytoy tapno maamoan ti rason ti pannakatay dagitoy a nakita laengen nga awan ti biag da iti maysa nga opisina iti pagadalan.
Nupay kasta, kunana a kitkitaen da ti anggulo a posible nga adda ti pakainagan na iti mental health ti napasamak kadagiti estudyante.
Kunana a naiget ti panangmonitor na ti maiyus-uswat a naun-uneg nga imbestigasyon ken kalikagom na a saanen a maulit ti insidente.
Mainaig iti daytoy, kunana a ti mental health ket pudno a problema ken saan nga imahinasyon laeng isut gapo na a mamati nga ad-adda a kasapulan ti pananglaban iti mental health crisis kadagiti pagadalan no sadinno naaprubaran iti Senado ti Basic Education Mental Health and Well-Being Promotion Act (Senate Bill No. 2200) iti maikatlo ken maudi a pannakaibasa na idi Setyembre.
Ummunan nga immapela ti Senador iti publiko a liklikan ti agiwaras kadagiti saan a beripikado nga impormasyon seknan iti insidente.
Kabayatanna, indanon ni Sen. Gatchalian ti pannakipagladingit na pamilya dagiti dua nga estudyante.
