LAOAG CITY – Naglikudan ni Senate President Sherwin Gatchalian a saan nga inakseptar ni Senate impeachment court presiding officer Francis “Chiz” Escudero ti panagtestigo ni dati a Senador Antonio Trillanes IV iti impeachment trial ni Vice President Sara Duterte.
Segun ken ni Gatchalian, saan laeng a ni Escudero ti nagdesision no maidasaran ti subpoena ni Trillanes gapu ta kinonsultarna daytoy kadagiti dadduma pay a senator-judges iti impeachment court.
Inbatadna nga iti impeachment trial ket umuna nga agpakonsultar ni Escudero kadagiti senator-judge sakbay daytoy a mangiparuk-at ti pinal a desision wenno ruling.
Ket karaman ditoy ti maipanggep iti panagtestigo koma ni Trillanes, a karaman kadagiti witness nga imbilang ti prosekusion iti manifestationna para iti Article II wenno ti alegasion ti saan a mailawlawag a kinabaknang ti Bise Presidente.
Maipalagip nga nangiparuk-at ti rakurak ni Trillanes idi Biernes ti pannakapaayna ken ni Sen. Escudero gapu ta saan daytoy a naidasaran ti subpoena a segun kenkuana, isuna laeng kadagiti testigo nga imbilang ti prosekusion para iti Article II ti saan a nakaawat iti nasao nga order.
Nupay kasta, inpetteng ni Gatchalian a saana daytoy a kayat a saoen a saanen a mabalin nga agtestigo ni Trillanes gapu ta awan ti subpoena manipud iti impeachment court.
