LAOAG CITY – Kiddawen ni Senadora Risa Hontiveros iti Korte nga agatendar ni Lyu Dong ti maipagarup a godfather dagiti Philippine Offshore Gaming Operator ditoy pagilian iti maiwayat a maudi nga imbestigasion ti Senado iti Philippine Offshore Gaming Operator.
Daytoy ket tapno malawlawagan ti koneksion ni Lyu Dong ken ni dismissed Bamban Mayor Alice Guo wenno Guo Hua Ping.
Ni Lyu Dong ti maitudtudo a big boss ti Lucky South 99 POGO hub idiay Porac, Pampanga no sadinno a naarestar isuna iti maysa a subdivision idiay Laguna idi Huebes ti rabii.
Nupay kasta, inpetteng ni Hontiveros a maudin a panagdengngeg ti ikeddeng ti Senate Committee on Women and Children maipanggep iti Philippine Offshore Gaming Operator.
Iti agdama, kunana nga awan pay ti eksakto a petsa no inton ano nga isayangkat ti komitena ti maudi a panagdengngeg ken iyunada pay laeng ti imbestigasion maipanggep iti pugante a ni Apollo Quiboloy.
