LAOAG CITY – Adu ti nakigtot iti nagbalin a rakurak ni Senador Imee Marcos kalpasan nga inakusaranna ti kabsatna a ni Presidente Ferdinand Marcos Jr. iti panagusar ti maipawil nga agas.
Inrakurakna nga ammona ken ti pamiliada nga agus-usar ti droga ti Presidente.
Daytoy a panangibutaktakna ket kabayatan iti maikadua nga aldaw ti anti-corruption rally nga inorganisar ti Iglesia ni Cristo.
Inlawlawagna a malaksid iti Presidente ket maipagarup nga agus-usar met ti droga ni First Lady Liza Araneta-Marcos.
Nupay kasta, saan a nalawag no adda ti ebidensia nga iruar ni Senadora Marcos tapno paneknekan ti nagbalin a rakurakna.
Kabayatanna, inawagan met ni Usec. Claire Castro a desperado nga addang ti akusasion ni Sen. Imee Marcos kontra iti Presidente.
Kinarit pay ni Castro ti Senadora nga imbes ket tumulong iti Presidente iti panangdalus ti gobierno.
Innayonna nga awan ti pangibasaran ti Senadora dagiti alegasionna kontra iti Presidente nangruna ket kinumpirmaran ti St. Luke’s a negatibo iti drug test ti Presidente.
