LAOAG CITY – Pormalen a nagsapata ni Sen. Imee Marcos kas maika-12 a Senador ditoy pagilian babaen ken ni Executive Judge Leila Myrtle Paqui, Regional Trial Court iti siudad ti Batac iti sango ti Paoay Church a maibilang a maysa kadagiti United Nations Educational, Scientific and Cultural Organization wenno UNESCO World Heritage Site.
Segun ken ni Sen. Marcos, saanna a ninamnama ti panangabakna gapu kadagiti agdama a mapaspasamak iti pulitika.
Nupay kasta, inbatadna nga awan ti imposible kas ti dinakamatna iti kaunaan nga State of the Province Address wenno SOPA-na idi isuna pay laeng ti Gobernador ditoy probinsia.
Inlawlawagna a basta adda ti tarabay ti Dios ken panagkaykaysa iti tunggal maysa ket awan ti imposible a mapasamak.
Kunana a gapu iti naiget ken nabara a suporta dagiti Ilokano kenkuana ket nangipasimudaag a nagtalinaed a sibibiag ti Solid North.
Mainaig iti daytoy, inkari ni Senadora Marcos a saanna a baybay-an dagiti kailianna no sadinno nga inpasingkedna nga agingga nga adda isuna iti Senado ket saan a maawanan ti timek dagiti umili.
Innayonna nga ipaigid pay laeng dagiti amin a saan a panagkikinnaawatan tapno mangngeg dagiti arungaing dagiti mabisbisin nga umili.
Kabayatanna, kadua ni Sen. Imee Marcos ti pamiliana kangrunaanna ti anakna a ni Gov. Matthew Marcos Manotoc ken Vice Gov. Cecilia Araneta Marcos.
