LAOAG CITY – Balligi a naisayangkat ti pannakairubuat ti maikapito a Rice Paddy Art a naiyuswat iti Mariano Marcos State University (MMSU) iti siudad ti Batac.
Segun ken ni Dr. Marilou Lucas, Director for Extension iti nasao nga unibersidad, daytoy a proyekto ket nagbinnuligan nga insayangkat ti Mariano Marcos State University ken ti Philippine Rice Research Institute wenno PhilRice tapno magutigot ken mainspiraran dagiti agtutubo a mangala iti kurso nga agrikultura ken dadduma pay a kaarngi a kurso.
Inbatadna a babaen iti naaramid a Rice Paddy Art ket ditoy a maipakita ti gapuanan ti siensia ken teknolohia ken maitandudo ti agri-tourism ditoy probinsia.
Inlawlawagna a ti kangrunaan a naipakita iti maikapito a Rice Paddy Art ket ti ladawan ni Senador Imee Marcos pakairamanan ti banner program-na nga “IMEEsolusyon” a mangipakita iti panangpadayaw kadagiti mannalon, agtutubo ken dadduma pay nga umili iti agtultuloy a pananglaban kadagiti agdama a karit ti panagbiag.
Kunana a babaen iti Rice Paddy Art ket maipakita ti napabaro a wagas ti panangpadayaw kadagiti umili kangrunaanna kadagiti mannalon iti pagay.
Mainaig iti daytoy, inpakaammo ni Dr. Lucas a nagusarda ti PSB Rc 82 ken NSIC Rc 222 kas green rice iti paddy art idinto a nausar met ti IR 1552 a purple rice variety tapno maipinta ti ladawan.
Innayonna a manamnama a naan-anay a makita ti ladawan kalpasan ti maysa a bulan no sadinno addanto manen ti balbaliw a pannakairubuatna nga idauloan ni Senadora Marcos.
Naammoan a karaman kadagiti nagtitinnulong a nagmula ket dagiti 27 nga agad-adal manipud iti College of Agriculture Food and Sustainable Development (CAFSD) pakairamanan ti Mariano Marcos State University President Dr. Shirley Agrupis, Vice Gov. Cecilia Araneta Marcos ken dadduma pay a kameng ti Sangguniang Panlungsod iti siudad ti Batac.
Maipalagip nga idi tawen 2018 tampok iti Paddy Art ni dati a Presidente Ferdinand Edralin Marcos, idi 2019 ket ni dati a First Lady Imelda Marcos, idi 2020 ni Dr. Santiago Obien, dati a Mariano Marcos State University President, idi 2021 ni Don Mariano Marcos, idi 2022 ni General Artemio Ricarte ken iti napalabas a tawen 2023 ket ni Presidente Ferdinand Marcos Jr.
Kabayatanna, masarakan ti Rice Paddy Art iti sango ti Administration Building ti Mariano Marcos State University, amianan a paset ti University Twingate.
