LAOAG CITY – Mamati ni Senate President Pro Tempore Jinggoy Estrada a saan a tumaod dagiti “ghost project” no awan ti kooperasyon ti Commission on Audit (COA).
Basar iti senador, masapol a mapaawagan iti sumaruno a panagdenggeg ti Senate Blue Ribbon Committee dagiti opisyal ti ahensya tapno agpalawag mainaig kadagiti maanomalya a flood control projects ti gobierno.
Maipalagip nga iti privilege speech ni Senador Ping Lacson, inbinglayna ti pie-sharing, wenno no kasanu ti pannakabingay ti pondo para iti flood control projects, no sadinno nga adda ti 0.5 agingga iti 1% ti mapmapan iti Commission on Audit.
Inrekomendar pay ni Estrada ti “heads must roll” wenno adda ti rumbeng nga agsungbat kadagiti korapsyon a nakairamanan dagiti proyekto ti gobyerno.
Innayon na a possible pay a maipagarop a sumagmamano nga empleyado ti Department of Public Works and Highways (DPWH) ti mangikorkorner kadagiti kontrata para iti maysa a proyekto.
Nupay kasta, nakadepende paylaeng ken ni Presidente Ferdinand Marcos Jr., no ikkaten wenno saan ni Secretary Manuel Bonoan gapu ta saan nga iwalin ti senador ti posibilidad nga ammo ti sekretaryo dagiti mapaspasamak iti babaen ti liderato na kas ti undersecretary, regional director, district engineer, ken dadduma pay.
