LAOAG CITY – Ginutigot ni Senador Francis “Kiko” Panghilinan dagiti Local Government Units (LGUs) nga aktibo nga ipatungpal ti Sagip Saka Act tapno mapapigsa ti mapastek dagiti mannalon ken mangngalap iti babaen ti direkta a panaggatang ti gobierno kadagiti maapit da.
Iti maysa a dayalogo a pakairamanan ti 67 a Mayors for Good Governance ken dagiti opisyal ti Department of Agriculture (DA) idi Enero 30 ita a tawen, inaramid ni Pangilinan ti panawagan no sadinno nga inpetteng na a napateg ti papel dagiti lokal a gobierno iti naan-anay a pannakaipatungpal ti linteg a naipasa idi 2019.
Iti babaen ti Sagip Saka Act, mapalubusan dagiti ahensya ti gobierno ken Local Government Units a direkta a gumatang kadagiti produkto manipod kadagiti mannalon ken mangngalap a saan a dumalan iti public bidding tapno naan-anay a maputed ti papel dagiti middleman ken maipangato ti mapastrek da.
Inkalintegan ti senador a dagiti Local Government Units ti kangrunaan nga agipatungpal kadagiti programa para iti agrikultura gapu ta isuda ti dagus a makaipaay ti solusyon kadagiti pagkasapulan iti komunidad, kasta met ti kinapateg ti koordinasyon ti national ken lokal a gobierno tapno maiparikna kadagiti mannalon ti benepisyo dagiti programa ti gobierno aglalo iti sektor ti agrikultura a nabayagen a makapaspasar ti nababa a mapaspastrek.
Kagiddan iti daytoy, inpalagip ni Pangilinan ti pannakaipatungpal ti Executive Orders Nos. 100 ken101 a pinirmaan ni Presidente Ferdinand Marcos Jr. iti napalabas a tawen no sadinno a ti Executive Order 100 ket mangikeddeng ti floor price it irik tapno maprotehiran dagiti mannalon kontra iti nababa a farmgate prices, idinto nga ibilbilin met ti Executive Order 101 iti amin nga ahensya ti gobyerno a naan-anay nga ipatungpal ti Sagip Saka Act.
Kabayatanna, inpetteng ti senador a ti direkta a panaggatang ti gobierno manipod iti lokal a mannalon ket mangipasigurado nga agtalinaed nga iti komunidad ti pagpulpuligusan ti pondo, a tumultulong iti panagdur-as ti lokal nga ekonomiya ken iti napaot a seguridad iti taraon.
