LAOAG CITY – Inadmitir ni Senate President Pro Tempore Panfilo “Ping” Lacson nga adda ti nadagsen a kasukat ti panagtalinaed na iti takderna kontra iti korapsyon, kagiddan ti panagbara ti imbestigasyon ti Senate Blue Ribbon Committee kadagiti maipagarop a maanomalya a flood control projects.
Segun ken ni Lacson, kas chairman ti Blue Ribbon Committee, adda dagiti papagayam na a maipagarop nga immadayo kenkuana ken addan dagiti baro a kabusor na a mabukbukel kabayatan ti panangtunton ti idaulwan na a komite ti ibidensya iti panagkunniber.
“Deja vu” no awagan daytoy ti senador nga ibilang na a kapada ti napasaran na idi 2003 iti panangilungalong na ti pannakaibasura ti sistema a pork barrel iti privilege speech na iti “Living Without Pork”.
Iti maysa nga statement, inpetteng ni Lacson nga ammo na nga adda dagiti possible a personal ken pampulitaka nga epekto idi inawat na ti panangidaulo na ti komite.
Innayon na a ti imbestigasyon iti maipagarop a maanomalya a flood control projects ken maysa kadagiti kasensitiboan nga isyu ti sangsangwen iti senado iti agdama gapu ta possible a mairamraaman ti sumagmamano nga agpanpanday linteg ken nangangato nga opisyal ti gobierno.
Kabayatanna, nagtalinaed ti takder ti senador nga agtalinaed a nakatutuk iti ebidensya ken mandato ti komite.
