LAOAG CITY – Nagpanawagan ni Senate President Panfilo “Ping” Lacson iti publiko nga i-report kadagiti otoridad dagiti gasolinaan a nasapa nga agipangato ti presio ti langis sakbay pay ti naikeddeng nga schedule ti oil price adjustment.
Segun kenkuana, ti nasapa a panangipangato ti presio wenno sobra a panaggatang ti langis tapno urnongen ket mabalin nga aglabsing iti Downstream Oil Industry Deregulation Act of 1998 ken Consumer Act of the Philippines a mabalin a mapagsungbat dagiti agsalungasing iti babaen ti probision kontra iti hoarding, profiteering ken mananggundaway a wagas ti panaglako.
Mainaig iti daytoy, inabisoan ti Senador ti publiko nga insigida nga i-report iti Philippine National Police (PNP) ken ti lokal a gobierno dagitoy dagiti establishimento ti panagbantay ti publiko tapno maprotektaran dagiti gumatang kontra iti panangabuso iti presio.
Immunan a nangiyetnag ti pammilin ti Department of Energy (DOE) iti nailian a pulisia ken dagiti lokal a gobierno a bantayan ken i-report dagiti kastoy a panaglabsing tapno insigida a maipila ti maiyannatop a kaso kontra kadagiti operator ti gasolinaan.
Agsagsagana metten ti publiko iti panagngato ti presio ti langis ditoy pagilian gapu iti panagngato ti presio daytoy ti world market kagiddan ti tension idiay Middle East.
Mapatta-patta a mabalin a ngumato ti presio ti kerosene ti agingga iti P24.92 ti kada litro, diesel ti P19.62 ken gasolina ti P10.43 ken manamnama a maianunsio ti pinal nga oil price adjustment inton bigat, aldaw ti Lunes, Marso 9.
