LAOAG CITY – Nagballaag ni Senate President Pro Tempore Panfilo “Ping” Lacson kontra kadagiti inawagan na kas “homegrown traitors” wenno dagiti Pilipino a nakasagana a mangilako ti pagilian kasukat ti bukod da nga interest.
Segun ken ni Lacson, iti nasurok a 50 a tawen a panagsersserbi na iti gobierno, no sadinno a kagudwa iti daytoy ket inbukbuk na iti intelligence work, malaksid iti technical intelligence, dakkel met a pangta iti seguridadt pagilian dagiti indibidwal a nakasagana a mangilako kadagiti impormasyon ken interes ti Pilipinas.
Kuna na a ti masansan a dakdakamaten na kas “recruitment in place,” no sadinno a mismo a ti sumagmamano a Pilipino ti agbalbalin a traydor kontra iti bukod a nakaiyanakan.
Maipalagip nga iti panagdengngeg ti Commission on Appointments idi Miyerkules, Pebrero 4, naiget a kinontra ni Lacson ti lungalong ni Sen. Rodante Marcoleta nga isuko ti Pilipinas ti Kalayaan Island Group (KIG).
Inpetteng ni Senador Lacson a ti panangisuko ti Kalayaan Island Group ket katukad ti panangisuko san laeng ti maysa a teritoryo no di ket ti paset ti Luzon wenno uray iti intero a pagilian.
Inlawlawag ni Lacson a ti Spratly Islands ti immuna a naduktalan ken tinagikua ti abogado a Pilipino ken adventurer a ni Tomas Cloma iti babaen ti prinsipyo ti “res nullius,” no sadinno a ti maysa a lote nga awan ti agtagikua ket mabalin a tagikwaen ti siasinno man a makaduktal ken makasakop iti daytoy.
Iti saan a nagbayag ket insuko ni Cloma ti karbengan iti daga ti gobierno ti Pilipinas, nga agserserbi kas maysa a legal a pagibasaran ti pagilian iti panangtagikua iti nasao a teritoryo.
