LAOAG CITY – Binalewala ni Senate President Pro Tempore Panfilo “Ping” Lacson dagiti sayangguseng nga adda ti pangta iti panagsukat ti liderato ti Senado, ken inladawan na dagitoy kas maysa a maulit-ulit a taktika a nabayagen a maus-usar tapno makaparnuay ti intriga iti uneg ti institusyon.
Daytoy ket kalpasan ti panagwaras dagiti report nga adda ti main-inaw a tignay tapno masukatan ti agdama a liderato ti senado, gapu ta kontento ti sumagmamano a senador iti liderato ni Senate President Vicente “Tito” Sotto III.
Segun kenni Lacson, saanen a baro dagitoy nga espekulasyon ken maibilang a nabayagen nga ay-ayam iti pampulitika iti Senado.
Inpetteng na a nabayagen nga adda dagiti manggangandat a mangpakapuy ti liderato iti babaen ti tsismis ken patta-patta, ngem awan ti pagbanbanagan na.
Iti maysa a rakurak, inyarig ni Lacson dagiti nasao a pangta iti maysa a “continuing crime,” nga ibilangna a kanayun a mapaspasamak ngem manmano laeng a pumudno.
Inlawlawag pay ti senador nga awan ti opisyal nga addang wenno kumpirmasyon manipod iti mayorya mainaig iti maibagbaga a maiyakar ti suporta wenno panagbalbaliw ti liderato iti senado.
Kabayatanna, arigna baliktad daytoy iti rakurak ni Sotto idi biernes no sadinno nga inbatad na nga adda dagiti gundaway nga aggiinnangaw da kadwa na ti sumagmamano a miyembro ti minorya karaman da Senador Bong Go ken Senador Robinhood Padilla ti possible nga iyaakar iti mayorya.
