LAOAG CITY – Inbutaktak ni Senate President Pro Tempore Panfilo “Ping” Lacson ti maipagarop a baro a raket iti Department of Public Works and Highways (DPWH) a pakairamramanan ti sumagmamano a junior personnel nga agsingsingir kadagiti kontratista ti rinibo a pisos ti kada pinanid dagiti kasapulan a dokumento.
Inbatad na a basar iti nakalap na nga impormasyon, karaman kadagiti singsingiren dagiti junior officials ket dagiti sumaganad:
Technical notes kas ti variation order: ₱10,000 ti kada dokumento ken ₱2,000 ti kada pinanid iti kada request
Planning and Design Section: ₱50,000 para iti soft copy, depende iti rehiyon
Materials testing report: 1% ti contract cost, awan ti resibo
Bid documents: ₱50,000, depende iti rehiyon
Inspection per initial billing: ₱5,000 ti kada inspector; nayun a ₱10,000 ken ₱5,000 iti kada pirma no taga-DPWH ti agaramid ti report
Final billing: ₱75,000 plus ₱5,000 ti kada project engineer
Quality assurance manipod iti Central Office: ₱50,000
Construction Performance Evaluation System (CPES): ₱50,000 agingga iti ₱200,000
Inpetteng ni Lacson a nagbalin a systemic no sadinno a nag-evolve iti nakaro a kinagamrud rason a nagnayun ti nayun a paggastusan ken pamastrekan, rason nga iti kada page ti bidding documents, material testing report, per page ti aniaman a documentary requirements, magatadan.
Inpaganetget na pay a saan a kontratista ti pudno nga apektado ti nayun a masingsingir no di ket dagiti umili gapu ta agtungtungpal daytoy iti substandard a proyekto.
