LAOAG CITY – Naadaan ti tensyon ken nagsinnungbat da Senate President Pro Tempore Panfilo “Ping” Lacson ken Senator Rodante Marcoleta kabayatan ti Blue Ribbon committee hearing mainaig iti opinyon no siasinno ti maibilang nga state witnesses kadagiti resource persons.
Kwinestyunaran ni Marcoleta, dati a chairman ti committee ti sungbat ni Lacson iti napalabas nga interview a ni Bulacan 1st district assistant engineer Brice Hernandez ti rumbeng a maipan iti witness protection program ti gobierno no ikumpara iti agasawa a kontrator a ni Curlee ken Sarah Discaya.
Inbatad met ni Lacson a ti sungbat na iti saludsod ket personal nga opinyon na laeng ken awan ti ruwar daytoyen iti iyus-uswat da nga hearing.
Ditoy metten nga inbatad na kenni Marcoleta a rumbeng a saan na a kwestyunaran ti bukod na nga opinyon.
Simmungbat met ni Marcoleta ken kunana a saan na a kweskwestyunaran ti opinyon ni Lacson ngem ti punto na ket isuna ti chairman ti Blue Ribbon committee.
Gapo iti daytoy ket temporaryo a nasuspenso ti hearing ken kabayatan daytoy ket sinaludsod ni Lacson kenni Marcoleta no apay a protprotehiran na dagiti agasawa a Discaya.
Inpetteng met ni Marcoleta a saan na a protprotehiran dagiti agasawa a Discaya ken inpalagip na nga idi isuna pay laeng ti chairman ti komite, inbatad na a masapol nga agaplikar da no kwalipikado da iti witness protection program.
Saan metten a simmungbat ni Lacson agingga a naituloy ti sesyon ken sinaludsod na kenni dati a Bulacan first district engineer Henry Alcantara nga itultuloy na statement na.
Kabayatanna, ni met Senate President Vicente “Tito” Sotto III ken Senator Ronald “Bato” Dela Rosa ti nagtinnulong a nagpakalma kenni Marcoleta ken ti sitwasyon.
