LAOAG CITY – Sinungbatan ni Sen. Panfilo Lacson ti immunan a rakurak ni Sen. Pia Cayetano nga awan ti nangkumusta kadakuada idi napasamak ti pammaltog iti Senado idi Mayo 13.
Maipalagip nga immunan a nagbalin nga emosyonal ni Sen. Pia kabayatan ti pananglagip na ti napasamak a riribok iti senado idi rabii ti Mayo 13, kagiddan ti panangdillaw na kadagiti sumagmamano a kakadwa da nga uray dekadan nga am-ammo na dagitoy ket saanda man laeng a kinumusta idi kangitingitan ti tension.
Sinaludsud met ni Lacson a kasanu da a kumustaen dagiti nararagsak a mangmangan, agkapkape ken naka-FB live pay.
Naakusaran pay ti minority bloc a maipagarop nga adda ti ammo na iti pammaltog a napasamak iti uneg ti senado.
Maipalagip a nabati iti Senado ti majority senators idi rabii ti Mayo 13 tapno mangiyuswat koma ti taripnong ngem sakbay a nadanun ti alas-otso ket napasamak ti pammaltog.
Nagsasaruno met a nag-live iti facebook account da dagiti senador kangitingitan ti tension iti uneg ti kangatoan a pagpandayan linteg iti kongreson.
Iti agdama, nagtalinaed a kontrobersyal ti nasao nga insidente kalpasan nga ibilang ti kaadoan kas staged wenno planado.
