LAOAG CITY – Inpasingked ni Senador Loren Legarda a dagiti topiko a mainaig iti disaster risk reduction wenno dagiti gannuat a mangkissay iti risgo ti epekto ti didigra ket rumbeng a mapagbalin nga isyu iti mapaspasangasang nga eleksion.
Segun ken ni Legarda, napateg a masaludsod kadagiti kandidato ken uray kadagiti lokal nga opisyal no ania ti planoda maipapan iti panangkissay iti epekto ti didigra a sumangbay ditoy pagilian.
Inpetteng ti agpanpandaylinteg a dakkel a paset ti pondo ti gobierno ti maiyal-alokar kadagiti biktima ti kalamidad ken didigra, agraman ti rehabilitasion dagiti lugar a nadadael gapu iti bagyo wenno animan a didigra.
Kinunana a no mataming ti panagsagana kadagiti kalamidad ken didigra, makissayan ti pannakausar ti pondo, ken ad-adu pay ti maipaay iti pannakapadur-as dagiti proyekto para iti panagdur-as ti Pilipinas ken iti edukasion dagiti ubbing.
Mainaig iti daytoy, inpaganetget ni Legarda a napateg ti akem ti pagilian kas host ti Asia Pacific Ministerial Dialogue on Disaster Risk Reduction ta maysa ti Pilipinas kadagiti nalaka a maapektaran iti climate change ken didigra.
